ГРЦИЈА: ТЕНЗИИТЕ ПРОДОЛЖУВААТ, АРМИЈАТА ДОТУРА БЕНЗИН ДО ПУМПИТЕ

Продолжуваат тензиите во Грција меѓу специјалната полиција и штрајкуваЧите на патарините кои водат надвор од Атина. Штрајкувачите се обидоа да ги запрат камионите кои носат гориво и други производи да помогнат во надминувањето на кризата создадена со протестот на повеќе од 60 000 приватни превозници на нафта. Грчките власти со воени камиони и бродови започнаа да пренесуваат нафта со цел да ги ублажат последиците од штрајкот кој им нанесе огромни загуби на грчката индустрија и туризам во екот на сезоната на годишни одмори. Војската им доставува гориво на аеродромите, болниците и останатите клучни објекти.

Ние сме овде затоа што владата не сака да ја промени својата позиција, верувајќи дека се моќни а според нас тие направија голема грешка и никакви фашистички мерки нема да им помогнат. Ако не се повлечат од одлуката да ни ги конфискуваат камионите и да седнат да разговараат со нас, ние ќе продолжиме да се спротиставуваме на овие фашистички мерки. - порача еден од штрајкувачите
Полицијата денеска е во придружба на камионите кои влегуваат и излегуваат од рафинериите како и низ  патарините. Штрајкувачите нападнале неколку возила и се обидуваат со блокади да го спречат заминувањето на камионите од рафинериите. Илјадници странски туристи остануваат неподвижни во Грција додека зачестија и откажувањата во хотелите. Ниту предупредувањата за можни затворски казни не ги поколебаа демонстрантите.  

Немаме друг избор сега. Нема избор. Ова е еднонасочна улица. Овие дозволи беа купени, не ни беа дадени од ПАСОК или Нова Демократија или некој друг. - вели Јанис Јавридис од здружението на возачи на цистерни од Тракија и Македонија
 
Државата не е беспомошна. Општеството не е без заштита. Реформите ќе продолжат и оние кои имаат голема одговорност кон општеството и Грчката држава, може и сега да ја превземат. Во спротивно тие остануваат единствено одговорни за тоа што ќе се случи. - вели Министерот за Транспорт на Грција, Димитрис Репас.
 
Штрајкот на приватните превозници на гориво е предизвикан од одлуката на владата да го либерализира нивниот сектор. Реформите кои ги спроведува владата на ПАСОК се неопходни заради добивање на огромната меѓународната финансиска помош која ја спаси Грција од банкрот. Во атина во моментов престојува и делегација од Европската Унија и ММФ со цел да го анализира прогресот во спроведувањето на реформите.