ЛЕ: Работнички го пречекува Ливерпул и се надева на реми за клупската историја

Работнички ќе го пречека најголемиот противник во клупската историја и најславниот тим што воопшто допатувал во Македонија, англискиот гигант Ливерпул, во третото квалификациско коло од Лигата на Европа. Владее оптимизам во редовите на „дебармаалци“, со порака до 22 илјадната публика на „Филип втори“ арената дека со отворен фудбал ќе му се спротивстават на големиот противник и ќе се борат за позитивен резултат, да останат непоразени, што според тренерот Зоран Стратев е можно да се оствари со офанзивна формација.

„Сигурен сум дека љубителите на фудбалот ќе бидат задоволни без разлика на крајниот резултат од првиот натпревар, иако потајно се надевам дека можеме да направиме позитивен резултат. Што би значело позитивен резултат? Едноставно за мене позитивен резултат е и да се одигра нерешено со Ливерпул. И тие се од крв и месо и тие играат единаесет и ние играме единаесет, така да мене многу ме охрабрува атмосферата во клубот и размислувањето на нашите фудбалери“, изјави Стратев, шефот на стручниот штаб на Работнички.

„Земав за храброст и ќе играме во формација 4:3:3, без разлика што се работи за Ливерпул. Во зависност од резултатот може да дојде до преформација во 4:5:1, но ќе играме со троца фудбалери кои имаат класични офанзивни квалитети, Вандаир, Фабио, Зе карлос Фиљо“, заклучи Стратев.

Капитенот никола Глигоров порачува дека и покрај одливот на неколку од соиграчите, поради направените трансфери, останатите живеат за пресметката со Ливерпул и ќе дадат се од себе во одлично светло да го презентираат македонскиот фудбал.

„Се надевам дека достоинствено и со голема самопочит ќе влеземе во натпреварот, и дека ќе ги оправдаме сите македонски очекувања, бидејќи ова е голем ден за Работнички и за македонскиот фудбал воопшто“, изјави Глигоров.

Од безбедноси причини и по препорака од УЕФА, портите на Националната арена, во четврток, ќе бидат отворени во 18.20 часот, а со цел да се избегнат турканиците и да се овозможи подобра контрола на билетите, кои се распродадени во целост, ќе бидат затворени во 19.45, иако натпреварот почнува еден час подоцна.