ТЕННИС

СПОНЗОРИТЕ СЕ ПОВЛЕКУВААТ ПОРАДИ ПОЗИТИВНИОТ ДОПИНГ ТЕСТ НА ШАРАПОВА

8 March, 2016 - 14:17

Поранешниот светски рекет број еден Марија Шарапова откако обелодени дека била позитивна на допинг тестот направен за време на Австралија опен, веќе денеска први со своја реакција настапија спонзорите на најплатената спортистка во светот. Најпозната компанија за производство на спортска облека, Најк, за англиските медиуми, најави дека ќе ја прекине соработката со Шарапова. Истото ќе го стори и позната марка за изработка на часовници Таг Хоер, која не планира да го обнови договорот со шампионката од Вимблдон во 2004 та година.

Ник Болитиери, поранешниот тренер на Шарапова, исто така беше шокиран по сознанието за позитивниот допинг тест. Тој истакна дека Шарапова секогаш била пример во се а сега како што објасни за медиумите во Англија, комплетно ќе и се смени животот, а не само тениската кариера. Од тука сите треба да ја прифатат одговорноста за се што ќе направат, вели Болитиери.

Петкратаната победничка на Гренд слем турнирите, Марија Шарапова, призна дека не поминала на антидопинг тестот за време на Отвореното првенство на Австралија во јануари годинава.

Анализата што и била направена, покажала дека таа ја користела супстанцата „мелдониум“, што ја земала од 2006 година поради здравствени причини.

Шарапова е привремено суспендирана до 12 март од Меѓународната тениска федерација и сега ја очекува натамошната разврска за нејзниниот случај и определувањето на казната.

„Не поминав на тестот и за тоа само јас сум целосно одговорна“, изјави Шарапова на прес-конференција во Лос Анџелес.

Таа откри дека во изминатите десет години го користела лекот „милдронат“, што и го препишал нејзиниот семеен лекар, но дури по применото писмо од Меѓународната тениска федерација за резултатот на тестот, првпат дознала оти препаратот е познат и под името „мелдониум“, што се наоѓа на листата на забранети супстанци.

„Направив голема грешка. Знам дека ме очекуваат последици поради тоа, но не сакам да ја завршам кариерата на овој начин“, рече Шарапова.

Руската тенисерка која следниот месец ќе наполни 29 години, првпат победи на еден Гренд слем турнир во 2004 година, кога имаше само 17 години, со триумфот во Вимблдон. Наредната година, таа беше рангирана како најдобрата тенисерка во светот.

Шарапова би можела да биде казнета до четири години забрана за настап, што би значело и крај на нејзината професионална кариера.

Неколкумина натпреварувачи, меѓутоа, беа казнети за користењето забранети средства, па се вратија на тениските терени, како што тоа се случи со Хрватот, Марин Чилиќ, српскиот тенисер Виктор Троицки и Чехината Барбара Стрикова.

Пред нив проблеми со недозволените супстанци и со суспензија имаа и некогашнети рекети број еден - Американецот Андре Агаси и Швајцарката Мартина Хингис. 

Веста е прочитана 257 пати

Copyright 2015 Телевизија Телма. Сите права се задржани. Текстов не смее да се печати или емитува, во целина или во делови, без договор со Телевизија Телма.